Første framsyning og radiobesøk

26. mars hadde første kull på Nynorsk scenespråksenter si første framsyning. Etterpå var dei på besøk hjå NRK P1 Vestland i dag.

I fleire veker har det første kullet jobba med tekst, for å ha framsyning på sunnfjorddialekt i Røyst mat og vin i Nynorskhuset. I tillegg har dei til saman jobba tre dagar med regissør og pianist, for å sy det heile saman.

Det vart eit variert program når deltakarane skulle innta foajéscena under lunsjen i Røyst. Stine, Jacob, Arjan og Pernille delte på å presentere både monologar og dialogar, og ikkje minst song. Sjølvsagt måtte MGPjr-låta Vestlandet syngast, men det vart også urpremiere av låta Kavadadarva, med tekst av Terje Lyngstad og melodi av pianist Harald Dahlstrøm.

Dei 70 publikummarane som møtte opp fekk også høyre dikt av både lokale Hans Sande og Kjersti Wøien Håland, og mindre lokale Halldis Moren Vesaas. I tillegg var det utdrag frå Frode Grytten, Arne Lygre og William Shakespeare, omsett av Edvard Hoem. Det heile vart sydd saman av regissør Jeff Pedersen.

Etter ei vellukka framsyning vart gjengen invitert inn i studio hjå Stian Sjursen Takle og Per Vidar Raunholm på NRK P1, i programmet Vestland i dag. Her snakka dei om korleis dei fyrste vekene i Førde har vore, korleis det er å ha dialektovergang til ei heilt ny dialekt, og kva som er målet deira med kurset. Heile sendinga kan du høyre her!