Ei reiseerindring frå Aasen-musikal og -tun

Kva gjer ein når det blir sett opp ein musikal om Ivar Aasen, 250 kilometer frå heime? Jo, ein reisar og ser denne. Nettopp dette gjorde Nynorsk scenespråksenter 19.-20. mars.

Teatret Vårt i Molde hadde onsdag premiere på musikalen “Eg har ikkje ord – Ein musikal om Ivar Aasen”. Teaterhuset var difor proppa fult av målfolk, og også Nynorsk scenespråksenter kasta seg inn i bilen og tok turen til Molde for denne framsyninga.

Ein spent gjeng reiste frå Førde onsdag morgon. Denne veka hadde deltakarane i tillegg total dialektovergang, så frå måndag morgon var dei fullblods sunnfjordingar, både i tale, tanke og draum. Dette tok dei også med på tur, og snakka sunnfjording med alle dei møtte. Til og med Olaug Nilssen var imponert over deltakarane!

Dagen etter den underhaldande og fine musikalen om Ivar Aasen, var det på tide å besøke heimstaden hans. Dette skulle berre mangle når vi likevel var i “nærområdet”, og vi svingte difor innom Aasentunet i Ørsta på vegen heim att. Her vart vi teke i mot blant anna av tidlegare leiar i Norsk Målungdom, Fredrik Hope, som hadde ei innleiing om Aasentunet og om språk i landet vårt i dag. Vi fekk også omvisning på tunet og inne på museet av Anne Natvig, som fortalte om livet til Aasen.

Etter ein tur med fleire ferger, flott natur og strålande ver var likevel gjengen glade når dei var attende på den gamle prestegarden i Førde, for dei har nok ting å gjera. Dei neste dagane vil gå til øving mot framsyning onsdag 26. mars.